*** ನಾನು ಆತ್ಮಸಾಕ್ಷಿ ಕಳಕೊಂಡ ದಿನ ***

ನಾನು ಆತ್ಮಸಾಕ್ಷಿ ಕಳಕೊಡ ದಿನ
ನನ್ನೊಳಗಿನ ಸೈತಾನ ದಡಬಡಿಸಿ ಎದ್ದು ಕೂತ;



ನಾನು ಆತ್ಮಸಾಕ್ಷಿ ಕಳಕೊಂಡ ದಿನ
ಏಸುವಿಗೆ ಕೆಲಸವಿಲ್ಲದಾಯಿತು;


ನಾನು ಆತ್ಮಸಾಕ್ಷಿ ಕಳಕೊಂಡ ದಿನ
ನನ್ನ ಕಾವಲುಧೂತ ಬಿಕ್ಕಿಬಿಕ್ಕಿ ಅಳುತ್ತಿದ್ದ;


ನಾನು ಆತ್ಮಸಾಕ್ಷಿ ಕಳಕೊಂಡ ದಿನ
ಕಲ್ವಾರಿಗೆ ಲೋಡುಗಟ್ಟಲೆ ಮೊಳೆಗಳು ಸರಬರಾಜಾದುವು;


ನಾನು ಆತ್ಮಸಾಕ್ಷಿ ಕಳಕೊಂಡ ದಿನ
ಬೀದಿಬೀದಿಯಲಿ ಸೈತಾನನಿಗೆ ವಿಜಯೋತ್ಸವ;

ನಾನು ಆತ್ಮಸಾಕ್ಷಿ ಕಳಕೊಂಡ ಆ ದಿನ
ನನ್ನೊಳಗಿನ ನರಕಕ್ಕೇ ಸ್ವಾತಂತ್ರ್ಯ..
'ದೇಶಭಕ್ತರ' ಈ ನರಕದಲ್ಲಿ
ನನಗೇ ಪಿತಾಮಹನ ಪಟ್ಟ!
- ಜಾನ್ ಸುಂಟಿಕೊಪ್ಪ.