ಅವ್ವ ಅವ್ವ ... ಚರಿತ್ರೆಯ ಪುಟವಾಗಿದ್ದಾಳೆ ; ನಾನು ಮಾತ್ರ ಚಪ್ಪಲಿ ಬಿಚ್ಚಿಟ್ಟು ಮುದುರಿಕೊಳ್ಳುತ್ತೇನೆ, ಮಣ್ಣ ಕಣಕಣವೂ ಅವ್ವನ ಒಡಲಾದಾಗ ಹಾಗೇ ಸುಮ್ಮಗೆ ಬಿದ್ದುಕೊಳ್ಳುತ್ತೇನೆ; ಅವ್ವ ಯಾವ ಮಣ್ಣಲ್ಲಿ ಮಣ್ಣಾದಳೋ, ಯಾವ ದಾಹಕ್ಕೆ ಬಲಿಯಾದಳೋ, ಎಲ್ಲೆಂದು ಹುಡುಕಲಿ!? ಅವ್ವಳ ಒಡಲಿನಲ್ಲಿದ್ದ ಅಷ್ಟೂ ದಿನಗಳು ನನ್ನ ಕಾಡುತ್ತಿವೆ, ಹಸಿವಿನ- ಬೆವರಿನ ನಿಟ್ಟುಸಿರುಗಳು ಬುಸಬುಸ ಬಿಡುತ್ತಿದ್ದ ಆ ಏದುಸಿರುಗಳು ತೆವಲಿಗಾಗಿ-ಸುಖಕ್ಕಾಗಿ ಅಡವಿಟ್ಟ ಆ ಸದ್ದಿಲ್ಲದ ಚೀತ್ಕಾರಗಳೂ ಗರ್ಭದೊಳಗೆ ಕೇಳಿಲ್ಲವೆಂದುಕೊಂಡೆಯಾ!? ಅವ್ವ... ಈ ಚರಿತ್ರೆ ಯಾರಿಗೆ ಬೇಕು ಹೇಳು? ಒಡಲಿನಿಂದ ಮಡಿಲಿಗೆ ಮಡಿಲಿನಿಂದ ತೋಳತೆಕ್ಕೆಗೆ ಆಮೇಲೆ ಪೊಡವಿಗೆ ಜಾರಿಜಾರಿ ಚರಿತ್ರೆಯ ಪುಟವಾಗುವುದು ಸದಾ ಇದ್ದದ್ದೇ... ಥೂ...ಹಾಳು ಜಗತ್ತು ಗೊಗ್ಗ ಬರದಿದ್ದರಷ್ಟೇ ಸಾಕು ಸುಮ್ಮಗೇ ಮುದುರಿಕೊಳ್ಳುತ್ತೇನೆ.. ಸುಮ್ಮಗೇ ಬಿದ್ದುಕೊಳ್ಳುತ್ತೇನೆ... ಜಾನ್ ಸುಂಟಿಕೊಪ್ಪ.
Posts
Showing posts from 2017
- Get link
- Other Apps
* ಎಲ್ಲಾರಂತಲ್ಲ ನನ್ನ ಹಸುಗೂಸು * ಎಲ್ಲಾರಂತಲ್ಲ ನನ್ನ ಹಸುಗೂಸು ಅಳುವುದೇ ಇಲ್ಲ! ಸದ್ದು ಮಾಡದೇ ಮಲಗಿದ್ದಾಳೆ ಸಮಾಧಿಯೊಳಗೆ; ಎಲ್ಲಾರಂತಲ್ಲ ನನ್ನ ಹಸುಗೂಸು ಕಣ್ಣು ಬಿಡಲೇ ಇಲ್ಲ! ಕ್ರೂರ ಜಗತ್ತು ಕಾಣುವ ಮೊದಲೇ ಅರ್ಥ ಮಾಡಿಕೊಂಡು ಬಿಟ್ಟಳು; ಎಲ್ಲಾರಂತಲ್ಲ ನನ್ನ ಹಸುಗೂಸು ಜೋಳಿಗೆ ತೊಟ್ಟಿಲು ಇಲ್ಲವೇ ಇಲ್ಲ ಭೂಮಿತಾಯ ಮಡಿಲೇ ಬೆಚ್ಚವಂತೆ ನೋಡಿ,... ಸದ್ದಿಲ್ಲ! ಎಲ್ಲರಂತಲ್ಲ ನನ್ನ ಹಸುಗೂಸು ಸಾವಿನೊಂದಿಗೇ ಹೋರಾಡಿ ತಾಯಿಗೆ ಜನ್ಮ ನೀಡಿದ್ದಾಳೆ; ಎಲ್ಲರಂತಲ್ಲ ನನ್ನ ಹಸುಗೂಸು ಮಡಿಲು ಏರಿ ಕತೆಹೇಳಿ ಮಲಗಿಸೆಂದು ಸತಾಯಿಸುವ ದೊಡ್ಡವಳಂತೆ ಅಲ್ಲವೇ ಅಲ್ಲ! ಸುಡುಗಾಡಿನ ಸಮಾಧಿಗಳ ಪಿಸುಗುಟ್ಟುವ ಕತೆಗಳಿಗೇ ತಲೆದೂಗುತ್ತಾಳೆ; ಎಲ್ಲರಂತಲ್ಲ ನನ್ನ ಮುದ್ದು ಹಸುಗೂಸು ನಿರ್ಜನ ಬೀದಿಯುದ್ದಕ್ಕೂ ಬೊಗಳಿ ಊಳಿಡುವ ನಾಯಿ ನರಿಗಳೇ ದಯವಿಟ್ಟು ಸುಮ್ಮಗಾಗಿ- ಎಲ್ಲರಂತಲ್ಲ ನನ್ನ ಹಸುಗೂಸು! ಜಾನ್ ಸುಂಟಿಕೊಪ್ಪ.
- Get link
- Other Apps
ದುಃಖವೆಂದರೆ, ಹೀಗೇ.... ನವಮಾಸಗಳ ಕನಸು-ನಿರೀಕ್ಷೆಗಳನ್ನು ಬಿಳಿಯುಡುಪಿನಲ್ಲಿ ಗಂಟುಕಟ್ಟುವುದು ಮತ್ತೆ... ಗುಂಡಿ ತೋಡಿ ಮಣ್ಣುಮುಚ್ಚಿ ಮುಗುಮ್ಮಾಗಿ ಬಿಕ್ಕಿಬಿಕ್ಕಿ ಅಳುವುದು; ನಾನೇನೂ ಅಬ್ರಹಾಮನಲ್ಲವಲ್ಲಾ, ಅದಕ್ಕೋ ಏನೋ ಬಲಿಯರ್ಪಣೆ ಆಗಿಯೇ ಹೋಯಿತು! ಎರಡು ಮಾತ್ರೆ ತನ್ನಿ ಎಂದು ಚೀಟಿ ಬರೆದು ಕೊಟ್ಟರು... ಅದೇಕೆಂದು ಕೇಳಿದೆ ನಿರ್ಭಾವುಕರಾಗಿ ಬಿಡಿಸಿ ಬಿಡಿಸಿ ಹೇಳಿದರು ಅರ್ಥವಾಯಿತು ಬಿಡಿ ಅಂದುಕೊಂಡೆ- ಅಮೃತವನ್ನು ಬತ್ತಿಸುವುದು ಎಷ್ಟೊಂದು ಸುಲಭ; ತಂಗಿಪಾಪು ಬೇಕು ತಂಗಿಪಾಪು ಬೇಕೆಂದು ಸದಾ ಹಾತೊರೆಯುತ್ತಿದ್ದ ಮಗಳು ಇಂದು ವಾರ್ಡಿಗೆ ಓಡೋಡಿ ಬಂದಳು. ಕಂಡಕಂಡ ಹಾಸಿಗೆಗಳಿಗೆ ಓಡೋಡಿ ಬಗ್ಗಿ ಇಣುಕಿ ಹುಡುಕಿದಳು, ಬೇಸತ್ತು ಕಡೇಗೆ ತುಟಿ ಕಚ್ಚಿ ಹೇಳಿದೆ- 'ತಂಗಿಪಾಪು ದೇವರ ಬಳಿಯಿದೆ ಮಗಳೇ' ಮಗಳಿಗೀಗ ಮುನಿಸು- ದೇವರ ಮೇಲೋ !? ತಂಗಿಯ ಮೇಲೋ ?! ಕೇಳುವ ಧೈರ್ಯ ನನಗಿಲ್ಲ; * ಎಲ್ಲಾ ತಲೆ ಬಿಸಿ ನಡುವೆ ನನ್ನ ಚಪ್ಪಲಿ ಕಾಣೆಯಾಯಿತು! ಹಿರಿಯರಿಗೆಲ್ಲಾ ಸಮಾಧಾನ, 'ಹೋಗಲಿ ಬಿಡು ಶನಿ ತೊಲಗಿತು' ನನಗೆ ಮಾತ್ರ ಅರ್ಥವಾಗುತ್ತಿಲ್ಲ- ಅಷ್ಟಕ್ಕೂ ಶನಿ ಯಾವುದು?! - ಜಾನ್ ಸುಂಟಿಕೊಪ್ಪ.
- Get link
- Other Apps
ನಾನು ಆತ್ಮಸಾಕ್ಷಿ ಕಳಕೊಡ ದಿನ ನನ್ನೊಳಗಿನ ಸೈತಾನ ದಡಬಡಿಸಿ ಎದ್ದು ಕೂತ; ನಾನು ಆತ್ಮಸಾಕ್ಷಿ ಕಳಕೊಂಡ ದಿನ ಏಸುವಿಗೆ ಕೆಲಸವಿಲ್ಲದಾಯಿತು; ನಾನು ಆತ್ಮಸಾಕ್ಷಿ ಕಳಕೊಂಡ ದಿನ ನನ್ನ ಕಾವಲುಧೂತ ಬಿಕ್ಕಿಬಿಕ್ಕಿ ಅಳುತ್ತಿದ್ದ; ನಾನು ಆತ್ಮಸಾಕ್ಷಿ ಕಳಕೊಂಡ ದಿನ ಕಲ್ವಾರಿಗೆ ಲೋಡುಗಟ್ಟಲೆ ಮೊಳೆಗಳು ಸರಬರಾಜಾದುವು; ನಾನು ಆತ್ಮಸಾಕ್ಷಿ ಕಳಕೊಂಡ ದಿನ ಬೀದಿಬೀದಿಯಲಿ ಸೈತಾನನಿಗೆ ವಿಜಯೋತ್ಸವ; ನಾನು ಆತ್ಮಸಾಕ್ಷಿ ಕಳಕೊಂಡ ಆ ದಿನ ನನ್ನೊಳಗಿನ ನರಕಕ್ಕೇ ಸ್ವಾತಂತ್ರ್ಯ.. 'ದೇಶಭಕ್ತರ' ಈ ನರಕದಲ್ಲಿ ನನಗೇ ಪಿತಾಮಹನ ಪಟ್ಟ! - ಜಾನ್ ಸುಂಟಿಕೊಪ್ಪ. http://johnsunticoppa.blogspot.com/2017/03/blog-post.html
*** ನಾನು ಆತ್ಮಸಾಕ್ಷಿ ಕಳಕೊಂಡ ದಿನ ***
- Get link
- Other Apps
ನಾನು ಆತ್ಮಸಾಕ್ಷಿ ಕಳಕೊಡ ದಿನ ನನ್ನೊಳಗಿನ ಸೈತಾನ ದಡಬಡಿಸಿ ಎದ್ದು ಕೂತ; ನಾನು ಆತ್ಮಸಾಕ್ಷಿ ಕಳಕೊಂಡ ದಿನ ಏಸುವಿಗೆ ಕೆಲಸವಿಲ್ಲದಾಯಿತು; ನಾನು ಆತ್ಮಸಾಕ್ಷಿ ಕಳಕೊಂಡ ದಿನ ನನ್ನ ಕಾವಲುಧೂತ ಬಿಕ್ಕಿಬಿಕ್ಕಿ ಅಳುತ್ತಿದ್ದ; ನಾನು ಆತ್ಮಸಾಕ್ಷಿ ಕಳಕೊಂಡ ದಿನ ಕಲ್ವಾರಿಗೆ ಲೋಡುಗಟ್ಟಲೆ ಮೊಳೆಗಳು ಸರಬರಾಜಾದುವು; ನಾನು ಆತ್ಮಸಾಕ್ಷಿ ಕಳಕೊಂಡ ದಿನ ಬೀದಿಬೀದಿಯಲಿ ಸೈತಾನನಿಗೆ ವಿಜಯೋತ್ಸವ; ನಾನು ಆತ್ಮಸಾಕ್ಷಿ ಕಳಕೊಂಡ ಆ ದಿನ ನನ್ನೊಳಗಿನ ನರಕಕ್ಕೇ ಸ್ವಾತಂತ್ರ್ಯ.. 'ದೇಶಭಕ್ತರ' ಈ ನರಕದಲ್ಲಿ ನನಗೇ ಪಿತಾಮಹನ ಪಟ್ಟ! - ಜಾನ್ ಸುಂಟಿಕೊಪ್ಪ.